القصيدة (2)
برمودا
...
هو زي طالع
و ما طالع
و زي واسع
و ما واسع
و زي واقع
و ما .... لا أظن واقع
إكون دا بنطلون شافع ...؟
إكون دا شنو؟؟
إكون لابساهو بالمقلوب؟؟
إكون نص توب؟
هه يا المتخرجين يا دوب..!
إكون دا الروب؟؟
إكون دا شنو؟؟
كيف يا شباب
إكون شراب؟؟
الشراب تحت ما فوق
إكون دا بنطلون مشنوق؟
حاجة عجيبة مالية السوق!!
إكون طاقية ممطوطة؟
إكون فوطة؟
غايتو عمل جنس جوطة!!
إكون دا شنو؟
إكون ماكسي؟
إكون عراقي بالعكسي؟
غايتو يا ناس جنس لبسة!
تخلي الزول اموت هسّه
إكون دا شنو؟
ناس قالو إكون فركة..
و ناس قلو ..!
إكون باقيهو
واقع منو في السكة
و واحد قال:
إكون سروال بدون تكة!!
دي ما شبكة!!
إكون دا شنو؟
إكون دا بنطلون نص كم؟
إكون دا ردا و عندو جضم؟
إكون بي كم؟؟؟
إكون دي بلورزة مجرورة ؟
إكون دي ملاية مفرورة ؟
ولا إكون لبس كورة؟
دخلو موضة كندورة!!!
إكون دا شنو ؟
دا برمودة .. دا برمودا !!!
أمانة وقعتك سودا
لبستي الليلة برمودا...؟؟
بكرة تجينا بالسراب
و برضو تقولي لي موضة
برمودا ...؟
براميد كل يوم تكتر
و برمودا
مثلث فقري جنب امريكا
قالوا برمي هيلكوبتر
تخشي الجامعة بي برمودا
خايف القاعة تتكسر
تخشي السينما بي برمودا
جاكسون ابقى زي عنتر!!!
تخشي الورشة بي برمودا
ابقى المرسيدس هنتر
تخشي الكورة بي برمودا
خايف آناس
إخش القون من السنتر
برمودا .. أمانة و قعتك سودا
حليل التوب
حليلنا نفخنا في الفاضي
و كانت قربة مقدودة .!
القصيدة الثالثة::ممو:::
القليب ما قادر المو
أصلو مجروح جاري دمو
ضربو زايد قاسي همو
قالو سبب الرجفة و الموت
الحليو الاسمو ممو
و اصلو ممو
كمو كطو
و كطو كمو
ابوها بابي
مامي امو
من الجماعة الكل يوم
قاعد يستحمو!!!
و العطر خمسين متر
حرم تشمو
و لما تقدل بس تقول
تقلع ترابا التمشي فيهو
عديل تخمو !!!
طبعو رقة
لونو منقة
في اروبا مارادونا
و في بلدنا مافي زيو
الا تنقا
و اصلي من ما شفت ممو
عقلي فره و قلبي دقه
و بنطلون الجينز طقه
أي عجور ضقتو بعدو
لقيتو منقة
باكو السجاير جوه جيبي
لقيتو حقة
الفنلة اللونه أبيض
فجأة جيت
و لقيتا زرقا
يا ريتني لو من مويتو
القى ليا بقه
ان شاء الله حتى
لو فيها شرقة
يا ريتني لو بحرو
القى ليا غرقة!!
كنت بغطس
و ما بدور لي تاني مرقة
تاني امرق؟؟
وين أقبل؟ للبعاعيت؟
عليكم الله ديا خلقة؟
ممو يا ناس ما اذانا
بي خدودو البرتكانة
ممو يا عالم جمانة
لا اكل يوم زي عشانا
كسرة بي لبن البطانة
و لا شرب من زير مغبر
زي فلانة و فرتكانة!!
ممو مافيش منو اتنين
هما مخلوقين براهم
و نحن مخلوقين برانا
الفرق
نحن بنعوس كسرة في الصاج
و هم رغيفن
يشتروه من اجزخانة
الفرق هما بمشو عديل افوتو
و نحن نترجا البكاسي
و يومي نتلفت ورانا
الفرق .......
هم عندهم توليت مكندش!!
و نحن عندنا أأآنا ..!!
ممو حني عليكي بابا
تعالي نعمل حبكانة
امكن اتعلم
احب ناس هاي أروق
بدلة فاخرة و استكانة
غايتو حا أقول ليك حالي!!
كان نفعت قولي أوكي..
ما نفعت ...
قولي ما نافع معانا
عندي شدة
و بنطلون واحد مرقع
حالو حالنا و مستوانا
ابوي مزارع
احفر الطين بالطواري
عرقو نازل
في هجير الدنيا
في الصيف و السخانة
شان القط لقمة لقمة
شان اتمتم لي ..عشانا
شان اشوفنا
بنقرأ نتعلم برانا
عمي ترزي و كان ...تمرجي
ولادو دستة ..!!
و كلهم ساكنين معانا
ممو يالجو المكندش
شوفي كتاحة هوانا
و اصلي عارف
بكره اظهر مغترب
ناكل النيم و الزلط
و انتو بتلوكو اللبانة
و نحن بنكابد نجابد
و نبقى في الآخر ضحية
الشواكيش كع ... كرع!!
اتقول بس بندقية ..
و المآسي الفي جوانا
كل يوم بتزيد شوية
الا بس اصبح عزانا
طيبة القلب البينزف
وكتين الناس البتشحد
و كل اطفال التشرد
لما امشوا عشان ارقدو
ينوموا في نص الشوارع
يعني ما يلقوا المكانة
الا بس اصبح عزانا
طيبة اخلاصنا و وفانا
وكتين اولاد المدارس
يوت .. ادافرو في طريقهم
شان اكتبو الحصة
في حينا و زمانا
الا بس اصبح عزانا
حب بلدنا
منبت الخير و الوداعة
ريحة الطين و الزراعة
حب تقاليدنا و طباعة
و فوقا ما بنرضا الاهانة
0 التعليقات
