حلمنيش الدش

قصيدة (1)الدِش
...
صحن يرقش
معلق فوق
في جو منعش
تجيهو قريب
يمين تهرش
عرفتوهو؟؟
دا اسمو الدش . .
غايتو الدش
جهاز مدهش
تقيف جمبو .. ما بتفوت
تكون واقف
محلك سر و متكلبش
و اجيك احساس
بانك انت ماكل نيم
ملخبط بقرع ابيض
ملخبط ايس كريم فوقو
واقف لط بحبة مش!!
لحظات و نواصل الارسال دي ما فيهو
ما بقطع ...!!!
و لا بقول اششش ...!!!!
يجيب اللقطة سحرية
مريح جداً
و ما فيش نشرة جوية
و لو جابوها...
الناس دي لا بتزهج ولا بتفوت
عارفين ليه؟؟
عشان بتزيع خواجية
قنواتو قريب ميه
و اخطر شي الفرنسية
تشوف اللقطة و تقهي .. و تسهي
تعاين فيها لا بتفتر ولا بترمش
مرقت بعيد
من ناس برد و ناس ورنش
دخلت لبيت و فيهو الدش ....
و فتشت ...
قناتو الأولى حولت ..
جابو قناة ..
افكر فيها بالمعنى
سرحت بعيد بكان تهنا
و عاينت ....
لقيت ارسالنا ياهو هنا
نعست .. و قمت حولت
قناتو التانية فتشت
و جاتنا اسبانيا الوديعة
الخواجية المذيعة
حاجة روعة و جد فظيعة
دي بتكون ...
جهجهت كل الخواجات
شرتن نص الصقيعة !!!!
و اخونا عماد
قال لي عاين للخواجية
عيونه جداد ....!!!
دي بت جدي!!!!
هيا يا عماد؟؟ !
دي بت جدك؟؟
دي مكنة رهيبة جد (فيري باد)
دي افلورا . . و جدك انت ود حماد!!
قالي مش اسبانية ؟؟؟
ما جدنا طارق بن زياد . .
و فتشت ...
قناتو التالتة حولت
جابو قناة لا محور ولا في صراع
نقاش هادي . .
ولا جوطة تجيب لصداع
و قارنتّ
بينا و بين قناتنا هنا ...
و بين .. أيام لها نعناع
و حولت
قناتو الرابعة فتشت
و كانت كورة في روما
بين ميلانو .. مرسيليا
و تاري الليلة كان يوما
و قارنت
بين ناسنا . . و ناس روما
بين مارادونا و الدومة
ناس اتطورت كسحت
و ناس سامع شخير نوما
و فتشت
قناتو الرابعة حولت
و اللقطة جاتنا من السويد
المدارا شمالي قطبي
واحد بجاي .. قاعد بجنبي
شاف السحاب
و لون الضباب
قالي تعرف ..
الجو هنا يكون اوربي
قلت ليهو
ياخي
هو في اوربا
انت اظنك ود مغبي
قال لي متين ألقالي خفسة للسويد
متين افوت من الكلاكلة الفيها قوبي!!
و غيرت
و قلت افوت و منو اطش
دخلت في بيت فيهو جهاز
يجيب اللقطة قالو فريش
و عاينت دعايات وش
تخت في هدوم .. تكب صابون
و تكشح وش
لمن مرقت عاينت
لقيت الزول معلق طش...
مشيت غيرو
دا داير اجر اللقطة من جارو
و اشوف لقطات فرايحية
و ما كضب علق ليهو صينية
اكان فجأة
جاتنا اللقطة في الشاشة
كلها فول و طحنية
مشيت غيرو و الفرصة حتما سانحة
قعدت ليك جنب الجهاز
شفت المذيع طوالي ايدو ممرجحة
حتى العمارة الفي الفلم
بنشوفا ذاتا ملولحة
يا أخوانا عاد شنو هو الخبر
قام لينا واحد فينا صاح ...
يا امة يا منبطحة
قومو يلا .. الزول دا فوق
علق سدادة المروحة
@
الناس في البيوت
ما تقيسا بي بيبانا
ما تغرك دشوشن
و الهمم خربانة
متشوبرين شديد
دايرين اشوفو الدنيا
كل اركانا
جابو الدش عديل
ربطوهو أعلى مكانة
خلو الناس تحت
برواديهم الخسرانة
لكن نحنا ما همانا
ممكن نسوي
ارسالنا برانا
نرسلو من هنا
لي اليزابيث في مكانا
نقول ليها شوفي يا ليزا
لئن تطيعي و تخضعي
لزوجناك عصام غانا
و كلمة الحق المعانا
ناس تقولا و ناس تناور
ناس تقول البث مباشر
يعني هو البص .. المباشر...
ناس تقول في الدش خطورة
و غزو كاسر
ناس تقول ...لا
الدش دا فلته
و طفرة في الزمن المعاصر
و نحن كلمتنا بنقولا
و ما بنكابر
انو ما عيب الخواجة
لما ارسل بث مباشر
عيبنا نحنا في نفوسنا
لا بنصنع تكنولوجيا
لا بنهئ شان نذاكر
عيبنا نحنا شكلة
في كل المحاور
زيف بيطفح
لما انتكت المنابر
بيهو اتكسر قلمنا
طار و اتشتت ورقنا
و فيهو اندفقت محابر
و ديمة نبكي في مجد غابر
حقو نحنا نقيف و نصحا
عشان ما نصنع مجد باكر
.....................