سالتني قالت الجديد شنو

سالتني قالت لي الجديد
قت ليها ياهو الكان امس
عايشين ترانا مع البشر
لكن معيشه بدون نفس
بالليل ننوم زي كل يوم
وباكر نحس قبل الشمس
الفات يحصل شغلو فات
والزيي راقد مندمس
والقام شرب شاي الصباح
شان يلحق الترحيل لبس
والطالب المالاقي بص
داير يحصل للدرس
والبالو مشغول بالملاح
والخاتي في بالو العرس
كيفن الشبكة عاد
والسوق كمان مابيتلمس
والبيت ايجار ومرتبات
قبال تجي البيت تتلحس
حق غاز ومويه وكهرباء
وسيد الايجار حارسك حرس
في الدنيا لو الحظ بجيب
ناس حظهم دايما نحس
من شدة ألجري والتعب
في الحافلة تلقي الزول نعس
لكن في ناس عايشين نعيم
عربات اقل شي مرسيدس
وناس ماها لاقي الف حديد
وناسا جيوبا جنس دفس
وياهو الجديد الكل يوم
الجايي باكر زي امس
السلعة كل مايوم تزيد
ماسمعنا يوم شيتا رخص